धरण : बाई मी धरण, धरण, धरण बांधीते

बाई मी धरण, धरण, धरण बांधीते

माझं मरण, मरण, मरण कांडीते, न बाई मी धरण...

झुंजमुंजु ग झालं

पीठ जात्यात आटलं

कणी कोंडा ग, कोंडा ग कोंडा मी रांधिते, न बाई मी धरण...

दिस कासऱ्याला आला

जीव मागे घोटाळला

तान्हं लेकरू, माझं लेकरू, पाटीखाली मी डालते, न बाई मी धरण...

काय सांगू उन्हाच्या झळा

 घावाखाली फूटे शिळा

कढ दाटे, कढ दाटे, पायी पाला मी बांधिते, न बाई मी धरण...

पेरापेरात साखर

त्यांचं पिकलं शिवार

घोटभर पाण्यासाठी सारं रान धुंडाळीते, न बाई मी धरण...

येल मांडवाला चढे

माझ्या घामाचे ग आळे

माझ्या अंगणी, माझ्या अंगणी,

पांचोळा ग पडे, न बाई मी धरण...

                    - दया पवार