चवदार तळ्याच्या काठी रोवून पाय खंबीर

चवदार तळ्याच्या काठी रोवून पाय खंबीर
राहिला उभा दलितांचा सेनानी रणगंभीर ll

दुबळ्यांची सेना मागे लक्तरे हाच गणवेष
परि होता संचारलेला अंगात नवा आवेश ll

त्या पराक्रमी भीमाने क्षणमात्र झाकले नेत्र
ओंजळीत घेता पाणी हे घडले तीर्थक्षेत्र ll

कापरे अधर्मा भरले रुढींची शकले झाली
चवदार तळ्याचा काठी जन्माला क्रांती आली ll

ती भीमगर्जना घुमली संघर्षसिद्ध बुद्धाची
ललकारी मानवतेची दुंदुभी नव्या युद्धाची ll

या दलितांनो, छलितांनो व्हा सज्ज तुम्ही नवसमरा
अन्याय मिटवण्यासाठी व्हा तयार बंधूनी कमरा ll

या पुढे न चालायाची अपमानित जीवनसरणी
रे पराक्रमाने तुमच्या छळणारे आणा चरणी ll

जे धुळीत जगती त्यांच्या जीवनास येवो अर्थ
चवदार तळे होवू दे समतेचे मंगल तीर्थ ll

--वसंत बापट

आभाळाची आम्ही लेकरं ...

आभाळाची आम्ही लेकरं, काळी माती आई
जात वेगळी नाही आम्हा, धर्म वेगळा नाही

श्रमगंगेच्या तीरावरती, कष्टकर्यांची आमुची वस्ती
नाव वेगळं नाही आम्हा, गाव वेगळा नाही

इनाम आम्हा एकच ठावे, घाम गाळुनी काम करावे
मार्ग वेगळा नाही आम्हा, स्वर्ग वेगळा नाही

माणुसकीचे अभंग नाते, घाम गाळुनी काम करावे
पंथ वेगळा नाही आम्हा संथ वेगळा नाही

कोटी कोटी हे बळकट बाहू, समतेचा रथ ओढून नेऊ
आस वेगळी नाही आम्हा, ध्यास वेगळा नाही

- वसंत बापट